Escribir no teu corpo, desde a fronte

até os pés e volver de novo arriba.

Dicirme onde queres esa palabra

que delongadamente eu demorarei

con tinta de vainilla ou caramelo

(ou iogur de ananás en salgadura)

que tanto ten o gusto da lingua

cando só importa gravarnos as bocas

e deixar a saborosa pegada

do outro escrita. Escrita, si, a forza

de tanto repetir e pronunciarmos

o ben que nos sabe

                                   a sobremesa compartida.